ប្រែសម្រួល៖ស-សម្បត្តិ
ទីក្រុងមុយនិច៖ អនុប្រធានាធិបតីសហរដ្ឋអាមេរិក លោក ជេឌី វ៉ាន់ បានប្តេជ្ញាកាលពីថ្ងៃសុក្រ (ថ្ងៃទី១៤ កុម្ភៈ) ថា វ៉ាស៊ីនតោនមានបំណងធានាឲ្យបាននូវសន្តិភាព «យូរអង្វែង» នៅពេលដែលលោកបានជួបប្រជុំលើកដំបូងជាមួយមេដឹកនាំអ៊ុយក្រែន លោក វ៉ូឡូឌីមៀរ ហ្សេឡិនស្គី ដើម្បីពិភាក្សាអំពីការជំរុញរបស់លោក ដូណាល់ ត្រាំ ក្នុងការចរចាជាមួយទីក្រុងមូស្គូ។

ការចរចានៅទីក្រុងមុយនិចត្រូវបានគេមើលឃើញថាជាពេលវេលាសំខាន់សម្រាប់ទីក្រុងគីវ ខណៈដែលខ្លួនព្យាយាមរក្សាវ៉ាស៊ីនតោននៅខាងខ្លួន បន្ទាប់ពីលោក ត្រាំ បានធ្វើឲ្យសម្ព័ន្ធមិត្តភ្ញាក់ផ្អើល ដោយប្រកាសអំពីកិច្ចខិតខំប្រឹងប្រែងសម្រាប់កិច្ចព្រមព្រៀងឈប់បាញ់ជាមួយមេដឹកនាំរុស្ស៊ី លោក វ្លាឌីមៀរ ពូទីន។

លោក វ៉ាន់ បានមានប្រសាសន៍នៅពេលបញ្ចប់កិច្ចប្រជុំថា «យើងចង់សម្រេចបាននូវសន្តិភាពដែលស្ថិតស្ថេរនិងយូរអង្វែង មិនមែនជាសន្តិភាពដែលនឹងធ្វើឲ្យអឺរ៉ុបខាងកើតស្ថិតក្នុងជម្លោះម្តងទៀតក្នុងរយៈពេលប៉ុន្មានឆ្នាំខាងមុខនោះទេ»។

លោកបានថ្លែងថា បានមាន «ការសន្ទនាល្អ» ជាមួយលោក ហ្សេឡិនស្គី អំពីរបៀបដែលពួកគេអាចសម្រេចបាននូវគោលដៅនោះ ហើយពួកគេនឹងមានការពិភាក្សាបន្ថែមទៀត «នៅក្នុងថ្ងៃ សប្តាហ៍ និងខែខាងមុខ»។

លោក ហ្សេឡិនស្គី ក៏បានសាទរចំពោះ «ការសន្ទនាដ៏ល្អ» ដោយមានប្រសាសន៍ថា ជំនួបជាមួយលោក វ៉ាន់ គឺជា «ការជួបគ្នាលើកដំបូងរបស់យើង មិនមែនជាលើកចុងក្រោយទេ ខ្ញុំជឿជាក់»។

លោក ហ្សេឡិនស្គី បានសរសេរនៅលើបណ្តាញ X នៅពេលក្រោយមកថា «យើងត្រៀមខ្លួនរួចជាស្រេចក្នុងការឈានទៅមុខឲ្យបានឆាប់រហ័សតាមដែលអាចធ្វើទៅបាន ឆ្ពោះទៅរកសន្តិភាពពិតប្រាកដនិងមានការធានា» ដោយបន្ថែមថា អ្នកតំណាងម្នាក់មកពីវ៉ាស៊ីនតោននឹងទៅទស្សនកិច្ចនៅទីក្រុងគីវ។

លោក ត្រាំ បានធ្វើឲ្យអ៊ុយក្រែននិងសម្ព័ន្ធមិត្តអឺរ៉ុបរបស់ខ្លួនមានការភ្ញាក់ផ្អើលកាលពីថ្ងៃពុធ ដោយយល់ព្រមចាប់ផ្តើមការចរចាឈប់បាញ់គ្នា ក្នុងការហៅទូរសព្ទជាសាធារណៈលើកដំបូងរបស់លោកជាមួយលោក ពូទីន ចាប់តាំងពីលោកត្រឡប់មកកាន់តំណែងវិញ។

ការរលាយទឹកកកយ៉ាងគំហុកនៃទំនាក់ទំនង បានបង្កើតឲ្យមានការភ័យខ្លាចថា អ៊ុយក្រែនអាចនឹងត្រូវបានទុកចោលក្នុងភាពត្រជាក់ បន្ទាប់ពីការប្រយុទ្ធប្រឆាំងនឹងការឈ្លានពានរបស់មូស្គូអស់រយៈពេលជិតបីឆ្នាំ។

លោក ហ្សេឡិនស្គី បាននិយាយនៅក្នុងវីដេអូខ្លីមួយនៃបទសម្ភាសន៍ជាមួយ NBC ដែលនឹងត្រូវផ្សាយពេញលេញនៅថ្ងៃអាទិត្យថា «យើងនឹងមានឱកាសតិចតួចណាស់ក្នុងការរស់រានមានជីវិត ដោយគ្មានការគាំទ្រពីសហរដ្ឋអាមេរិក»។

មន្ត្រីអាមេរិកបានអះអាងថា លោក ហ្សេឡិនស្គី នឹងចូលរួមក្នុងការចរចា ហើយមេដឹកនាំអ៊ុយក្រែនបាននិយាយថា លោកនឹងត្រៀមខ្លួនអង្គុយចរចាជាមួយលោក ពូទីន បន្ទាប់ពីឯកភាពលើ «ផែនការរួម» ជាមួយលោក ត្រាំ។

លោក វ៉ាន់ បាននិយាយមុនកិច្ចប្រជុំថា សហរដ្ឋអាមេរិកត្រៀមខ្លួនរួចជាស្រេចក្នុងការដាក់សម្ពាធលើរុស្ស៊ី ដោយបន្ថែមថា អឺរ៉ុបគួរតែអង្គុយនៅតុចរចា «ជាក់ជាមិនខាន»។
ប៉ុន្តែលោកក៏បានប្រាប់អឺរ៉ុបឲ្យ «បង្កើន» ការពង្រឹងការការពារខ្លួនឯង ដើម្បីអនុញ្ញាតឲ្យវ៉ាស៊ីនតោនផ្តោតលើការគំរាមកំហែងនៅកន្លែងផ្សេងទៀតក្នុងពិភពលោក។

• លេខទូរសព្ទរបស់លោក ត្រាំ

មន្ត្រីអាមេរិកបានផ្ញើសារចម្រុះអំពីយុទ្ធសាស្ត្ររបស់វ៉ាស៊ីនតោន បន្ទាប់ពីប្រធានបញ្ជាការក្រសួងការពារជាតិ លោក ភីត ហិកស៊ីត ហាក់បីដូចជាបានបដិសេធមិនឲ្យអ៊ុយក្រែនចូលជាសមាជិកអង្គការសន្ធិសញ្ញាអាត្លង់ទិកខាងជើង ឬការយកទឹកដីរបស់ខ្លួនមកវិញទាំងអស់។

ការណ៍នេះបានបង្កើតឲ្យមានការព្រួយបារម្ភយ៉ាងខ្លាំងនៅទីក្រុងគីវនិងអឺរ៉ុបថា អ៊ុយក្រែនអាចនឹងត្រូវបានបង្ខំឲ្យចូលរួមក្នុងកិច្ចព្រមព្រៀងមិនល្អមួយ ដែលធ្វើឲ្យទ្វីបនេះប្រឈមមុខនឹងលោក ពូទីន ដែលកាន់តែមានអំណាច។

ប៉ុន្តែលោក វ៉ាន់ បានប្រាប់កាសែត Wall Street Journal ថា លោក ត្រាំ នឹងដាក់អ្វីៗទាំងអស់ «លើតុ» ក្នុងការចរចាដែលអាចកើតឡើង ហើយថាវ៉ាស៊ីនតោនអាចនឹងប្រើ «ការគាបសង្កត់ផ្នែកយោធា» ប្រឆាំងនឹងរុស្ស៊ី ដើម្បីបង្ខំឲ្យមានកិច្ចព្រមព្រៀងមួយ។

លោកមិនបានបង្ហាញព័ត៌មានបន្ថែមក្នុងសុន្ទរកថាគន្លឹះដែលត្រូវបានរង់ចាំយ៉ាងអន្ទះសារនោះទេ ដែលភាគច្រើនផ្តោតលើការស្តីបន្ទោសអឺរ៉ុបអំពីអន្តោប្រវេសន៍និងសេរីភាពក្នុងការបញ្ចេញមតិ។

អារ៉ាប៊ីសាអូឌីត បន្ទាប់ពីត្រូវបានលោក ត្រាំ ដាក់ឈ្មោះថាជាទីតាំងដែលអាចកើតឡើងសម្រាប់ការជួបជាមួយលោក ពូទីន បាននិយាយថា ខ្លួននឹងស្វាគមន៍ការរៀបចំការចរចាណាមួយរវាងមេដឹកនាំទាំងពីរ។

លោក ហ្សេឡិនស្គី ហាក់បីដូចជាបានបន្ថយការភ័យខ្លាចថា លោក ត្រាំ កំពុងកាត់ផ្តាច់ទីក្រុងគីវ ដោយនិយាយថា ប្រធានាធិបតីអាមេរិកបានផ្តល់លេខទូរសព្ទផ្ទាល់ខ្លួនរបស់លោកនៅពេលពួកគេបាននិយាយគ្នា។

សម្ព័ន្ធមិត្តអឺរ៉ុប ដែលជាមួយនឹងវ៉ាស៊ីនតោន គឺជាអ្នកគាំទ្រដ៏ខ្លាំងបំផុតរបស់អ៊ុយក្រែន បានទាមទារឲ្យពួកគេត្រូវបានរួមបញ្ចូលក្នុងការចរចាដែលនឹងប៉ះពាល់ដល់សន្តិសុខទ្វីបរបស់ពួកគេ។

ប្រធានាធិបតីបារាំង លោក អេម៉ានុយអែល ម៉ាក្រុង បាននិយាយថា លោកបានធានាជាមួយលោក ហ្សេឡិនស្គី ថា វាគឺជា «ជនជាតិអ៊ុយក្រែនតែម្នាក់ឯងប៉ុណ្ណោះដែលអាចដឹកនាំការពិភាក្សាសម្រាប់សន្តិភាពរឹងមាំនិងយូរអង្វែង» ជាមួយរុស្ស៊ី។

លោក ហ្សេឡិនស្គី បាននិយាយថា លោកបានពិភាក្សាជាមួយលោក ម៉ាក្រុង អំពី «បញ្ហាសំខាន់ៗជាច្រើន រួមទាំងការធានាសន្តិសុខនិងសំណើជាក់លាក់ពីប្រទេសបារាំង»។

ក្នុងការខិតខំប្រឹងប្រែងដើម្បីរក្សាវ៉ាស៊ីនតោននៅជិត ទីក្រុងគីវបានធ្វើការចរចាស្តីពីការផ្តល់សិទ្ធិចូលដំណើរការទៅកាន់ប្រភពរ៉ែកម្ររបស់ខ្លួន ជាថ្នូរនឹងការគាំទ្រផ្នែកសន្តិសុខពីសហរដ្ឋអាមេរិកនាពេលអនាគត។

ប្រធានគណៈកម្មាធិការសហភាពអឺរ៉ុប លោកស្រី អ៊ូស៊ូឡា វ៉ុន ដឺ ឡាយិន បានព្រមានថា ការបង្ខំអ៊ុយក្រែនឲ្យចូលរួមក្នុងកិច្ចព្រមព្រៀងមិនល្អមួយ នឹងធ្វើឲ្យប៉ះពាល់ដល់ផលប្រយោជន៍របស់សហរដ្ឋអាមេរិក។

លោកស្រីបានមានប្រសាសន៍ថា «ខ្ញុំជឿជាក់ថា តាមរយៈការធ្វើការរួមគ្នា យើងអាចសម្រេចបាននូវសន្តិភាពដែលយុត្តិធម៌និងយូរអង្វែងនោះ»។

• ការវាយប្រហារនៅចែរណូប៊ីល

ខណៈពេលដែលអឺរ៉ុបតាមដានដោយភាពរំជើបរំជួលអំពីជំហររបស់សហរដ្ឋអាមេរិកលើអ៊ុយក្រែន មានភាពមិនច្បាស់លាស់តិចតួចអំពីការប្តេជ្ញាចិត្តរបស់លោក ត្រាំ ក្នុងការជំរុញឲ្យអឺរ៉ុបចំណាយច្រើនជាងមុនលើការការពារខ្លួន។

ការភ័យខ្លាចថា លោក វ៉ាន់ អាចនឹងប្រកាសអំពីការកាត់បន្ថយកងទ័ពអាមេរិកយ៉ាងច្រើននៅអឺរ៉ុប មិនបានកើតឡើងទេ ប៉ុន្តែលោកបានធ្វើការព្រមានម្តងទៀតថា វ៉ាស៊ីនតោនត្រូវការផ្តោតការយកចិត្តទុកដាក់ច្រើនជាងមុនទៅលើផ្នែកផ្សេងទៀតនៃពិភពលោក។

ក្រៅកិច្ចប្រជុំ លោក វ៉ាន់ ក៏បានជួបជាមួយមេដឹកនាំគណបក្សស្តាំនិយមជ្រុល Alternative for Germany (AfD) លោកស្រី អាលីស វែដែល យោងតាមសារព័ត៌មានអាល្លឺម៉ង់។

វាកើតឡើងខណៈពេលដែលលោក វ៉ាន់ រិះគន់ប្រទេសអាល្លឺម៉ង់ចំពោះការរារាំងស្តាំនិយមជ្រុលមិនឲ្យចែករំលែកអំណាចក្នុងការបោះឆ្នោតខាងមុខ។

បេក្ខជនអភិរក្សនិយមនិងអ្នកដែលត្រូវបានគេមើលឃើញថានឹងឈ្នះ លោក ហ្វ្រីដ្រិច មឺស អះអាងថា លោកនឹងមិនគ្រប់គ្រងជាមួយ AfD ឬស្វែងរកការគាំទ្រពីគណបក្សនេះដោយសកម្មទេ។

ក្នុងចំណោមសកម្មភាពការទូតយ៉ាងមមាញឹកនៅទីក្រុងមុយនិច លោក ហ្សេឡិនស្គី បាននិយាយថា នៅលើទឹកដីអ៊ុយក្រែន ដ្រូនរុស្ស៊ីមួយបានវាយប្រហារគម្របដែលត្រូវបានសាងសង់ឡើងដើម្បីទប់ស្កាត់ការបំភាយវិទ្យុសកម្មនៅរោងចក្រថាមពលនុយក្លេអ៊ែរចែរណូប៊ីល ប៉ុន្តែលោកបានបន្ថែមថា កម្រិតវិទ្យុសកម្មនៅធម្មតា។

កងកម្លាំងអាកាសអ៊ុយក្រែនបាននិយាយថា រុស្ស៊ីបានបាញ់ដ្រូន ១៣៣ គ្រឿងទូទាំងប្រទេសនៅពេលយប់ រួមទាំងដ្រូនវាយប្រហារ ដោយគោលដៅតំបន់ភាគខាងជើងនៃប្រទេស ដែលជាកន្លែងស្ថិតនៃរោងចក្រចែរណូប៊ីល។

លោក ហ្សេឡិនស្គី បាននិយាយថា ការវាយប្រហារនេះគឺជាភស្តុតាងបង្ហាញថា «លោក ពូទីន ពិតជាមិនត្រៀមខ្លួនសម្រាប់ការចរចាទេ – លោកកំពុងត្រៀមខ្លួនដើម្បីបន្តបោកប្រាស់ពិភពលោក»៕
ប្រភព៖ AFP/kg